ޑްރޯން އުފެއްދުމުގައި ބޮޑު ބާރަކަށް ވުމަށް އިންޑިއާއިން ސިޔާސަތަށް ގެނަސްފައިވާ ބަދަލުގެ ދަށުން ޑްރޯން އުފައްދަން ޝައުގުވެރިވާ 14 ކުންފުންޏަށް ސަރުކާރުން އެހީ ދިނުމަށް ނިންމައިފިއެވެ.
މި 14 ކުންފުނިތަކުގެ ތެރޭން އެންމެ މަޝްހޫރު ކުންފުންޏަކީ، އޭޝިއާގެ އެންމެ މުއްސަނދި މަހާ ސާދާގަރު ގައުތަމް އަދާނީގެ އަދާނީ ޖޮއިންޓް ވެންޗަރ ކުންފުންޏެވެ. މިއީ އިޒްރޭލުގެ އެލްބިޓްއާ އައިޑިއާ ފޯޖު ކުންފުންޏާ ގުޅިގެން އުފައްދާ ފައިވާ ޖޮއިންޓް ވެންޗާއެކެވެ.
ޑްރޯން އުފެއްދުމުގެ ލީޑަރަކަށް ވުމުގެ ގޮތުން އިންޑިއާއިން ވަނީ ޑްރޯން އުފައްދަން ޝައުގުވެރިވާ ކުންފުނިތަކަށް އުފެއްދުންތެރިކަމާއި އަޅުވައިގެން ހިތްވަރު ދޭ ސްކީމެއް އިއުލާން ކޮށްފައެވެ. މި ޕްރޮޑަކްޝަން ލިންކްޑް އިންސެންޓިވް (ޕީއެލްއައި) ސްކީމްގެ ބެނެފިޝަރީންގެ ގޮތުގައި މިއަދު 14 ޑްރޯން ކުންފުންޏެއް ހޮވާފައިވާ ކަމަށް އިންޑިއާގެ އޭވިއޭޝަން މިނިސްޓްރީން އިއުލާން ކޮށްފިއެވެ.
މި އުފެއްދުންތަކަށް ހިތްވަރު ދިނުމުގެ ގޮތުން ސަރުކާރުން ފައިސާ ދިނުމަށް ހިސާބު ކުރާނީ ގީއެސްޓިއާއެކު ސާފު ފައިދާއިން ޖީއެސްޓިއާއެކު މުދަލުގެ ޚަރަދު ކެނޑުމަށްފަހުއެވެ. އެގޮތުން ސަރުކާރުން ދޭނީ 20 ޕަސެންޓެވެ.
ސިވިލް އެވިއޭޝަން މިނިސްޓްރީން ބުނެފައި ވަނީ އަދި ޝަރުތު ފުރިހަމަވާ އިތުރު ކުންފުނިތައް ހުރުމާއެކު 14 ކުންފުންޏަށް ވުރެން އަދަދު އިތުރުވެގެން ހިނގައިދާނެ ކަމަށެވެ.
