ރަޝިއާގެ މަހާ ސާދާގަރުން ޔުކްރެއިންގައި ރަޝިޔާއިން ކުރަމުންދާ ހަނގުރާމައާ ދެކޮޅަށް އަޑު އުފުލަން ފަށައިފިއެވެ. އޮލެގް ޓިންކޯވް އަކީ ހުޅަނގުން ދަތިކުރުމުގެ ފިޔަވަޅު އަޅާފައިވާ ރަޝިޔާގެ މަހާސާދާގަރެކެވެ. އޭނާ އިންސަގްރާމްގައި ޕޯސްޓުކުރަމުން ޔުކްރެއިން ހަނގުރާމަ ހުއްޓާ ލުމަށް ގޮވާލާފައި ވެއެވެ. އަދި ހުޅަނަގަށް އޭނާ ގޮވާލީ ރަޝިޔާގެ ޕޫޓިންއަށް އަބުރު ސަލާމަތް ކުރެވޭ ގޮތަށް މި ހަނގުރާމައިން ބޭރުވާން ފުރުސަތު ދިނުމަށެވެ. އޭމނާ ސިފަ ކުރި ގޮތުގައި މިއީ މޮޔަ ހަނގުރާމައެކެވެ. އަދި ބުނެފައި ވަނީ "ހަނގުރާމަ ކުރުމަށް ޖެނެރަލުން އޯޑަރު ދިނުމަށްފަހު ރަނގަޅަށް ބޯލައިގެން ނިދިން ހޭލިއިރު އެނގުނީ ހަނގުރާމަ ކުރުމަށް ތިބި ސިފައިންނަކީ ކަނޑު ކޮސް ބައެއް" ކަމަށެވެ.
ސަމާލުވުމަށް: މި ލިޔުމުގައި ބޭއަދަބީ ބަސްތައް ހުރެދާނެ!
ބޭ އަދަބީ ބަސްތަކެއް ބޭނުން ކޮށްގެން އޮލެގް ޓިންކޯވް ލިޔުނު އިންސްޓަގްރާމް ޕޯސްޓުގައި ބުނެފައި ވަނީ މި ހަނުގރާމައިން "އެއްވެސް މަންފާއެއް" ނުފެންނަ ކަމަށެވެ.
ޓިންކޯވްއަކީ ރަޝިޔާގެ އެންމެ މަޝްހޫރު ވިޔަފާރިވެރިންގެ ތެރޭގައި އެކެކެވެ. އޭނާ ވަނީ ގްލޯބަލް އޮންލައިން ބޭންކް ޓިންކޮފް ބޭންކް އުފައްދާ ފައެވެ. އަދި ސައިކްލިން ޓީމް ޓިންކޮފް-ސަކްސޯ މިލްކު ވެރިއަކީވެސް އޭނާއެވެ.
އަދި އޭނާއަކީ ރައީސް ވްލަޑިމިއަރ ޕޫޓިންގެ އަމަލުތައް ފާޅުގައި ކުށްވެރި ކުރާ މީހެކެވެ. ނަމަވެސް ހުޅަނގުން ދަތިކުރުމުގެ ފިޔަވަޅު އަޅާފައިވާ މީހުންގެ ތެރޭގައި އޭނާވެސް ހިމެނެއެވެ.
ރަޝިޔާގެ އެންމެ ފާހަގަކޮށްލެވޭ އެހެން ދެ ސާދާގަރުން ކަމަށްވާ މިޚާއިލް ފްރިޑްމަން އާއި އޮލެގް ޑިރިޕަސްކާ ވެސް ވަނީ ސުލްހައަށް ގޮވާލާފައެވެ. މި ދެމީހުންނަށްވެސް ދަތިކުރުމުގެ ފިޔަވަޅު އަޅާފައި ވެއެވެ. ނަމަވެސް ޕޫޓިންއާ ދެކޮޅަށް ސާފު ބަހުން މިއިން އެކަކުވެސް އެއްޗެއް ނުބުނެއެވެ.
ބިލިއަނަރު ބޭންކަރެއް ކަމަށްވާ ފްރިޑްމަން ބުނެފައި ވަނީ ޒާތީ އެއްވެސް ވާހަކައެއް ދެއްކުމުން ނުރައްކާވާނީ ހަމައެކަނި އޭނާގެ އަމިއްލަ ނަފްސަށް އެކަނި ނޫން ކަމަށާއި އޭނާގެ ސްޓާފުންނާއި މުވައްޒިފުންނަށް ވެސް އެކަމުން ނުރައްކަލެއް ކުރިމަތިވެދާނެ ކަމަށް ބެލެވޭ ކަމަށެވެ.
