އެމެރިކާ މީހުން އިންޖީލު ކިޔުން ހުއްޓާލައިފިއެވެ. ކްރިސްޓިއަނިޓީ ޓުޑޭ މަޖައްލާއިން ޝައިއުކުރި އަހަރީ ތަފާސްހިސާބުގައި ބުނެފައި ވަނީ، އެމީހުންގެ އެންމެ ފަހުގެ ތަފާސްހިސާބަކީ ގަބޫލުކުރަން އުދަގޫ އަދަދުތަކެއް ކަމަށެވެ. 26 މިލިއަން މީހުން ވަނީ އެއްކޮށް އިންޖީލު ކިޔުން ހުއްޓާލާފައި ކަމަށް ސާވޭން ވަނީ ދައްކާފައެވެ.
"އަޅުގަނޑުމެން ހިސާބު ތައް ތަކުރާރު ކޮށް މުރާޖައާ ކުރިން. އަނެއްކާވެސް އަދަދުތައް ޑަބަލް ކޮށް ޗެކް ކޮށް އަނެއްކާވެސް އަދަދުތައް ދުއްވައި ބެލީ... އަދި ވެސް އެއްފަހަރު ބެލީ." އެމެރިކަން ބައިބަލް ސޮސައިޓީގެ ލީޑް ރިސާޗަރެއް ކަމަށްވާ ޖޯން ޕްލެކާ، 2022 ވަނަ އަހަރުގެ ރިޕޯޓުގައި ލިޔެފައިވެ އެވެ. "އަޅުގަނޑުމެންނަށް ފެނުނު މަންޒަރުން ވަރަށް ހިތްދަތި، ހިތްދަތި، އަދި ނުތަނަވަސްކަމެއް ލިބުނީ."
2021 ވަނަ އަހަރު އެމެރިކާގެ ގާތްގަނޑަކަށް 50 އިންސައްތަ މީހުން ބުނެފައިވަނީ އަހަރެއްގެ މައްޗަށް މަދުވެގެން ތިން ހަތަރު ފަހަރު އަމިއްލައަށް އެމީހުން އިންޖީލު ކިޔައި އުޅޭ ކަމަށެވެ. އަދި 2011 ވަނަ އަހަރުން ފެށިގެން އެ ނިސްބަތް ވަނީ ކޮންމެވެސް ވަރަކަށް އެއްވަރެއްގައި ހިފެހެއްޓިފަ އެވެ.
އެކަމަކު 2022 ވަނަ އަހަރު އިންޖީލު ކިޔާ މީހުންގެ އަދަދު ވަނީ 11 ޕޮއިންޓް ދަށަށް ގޮސްފަ އެވެ. މިހާރު ހަމައެކަނި 39 ޕަސެންޓް މީހުން ބުނަނީ އަހަރެއްގެ މައްޗަށް ނުވަތަ އެއަށް ވުރެ ގިނަ ފަހަރު އިންޖީލު ހުޅުވާ ކަމަށެވެ.
ސްޓޭޓް އޮފް ދަ ބައިބްލްގެ 12 ވަނަ އަހަރީ ރިޕޯޓްގައިވާ ގޮތުން 2022 ވަނަ އަހަރުގެ ތަފާސްހިސާބުން ދައްކަނީ އާދަވެގެން އިންޖީލު ކިޔައި އުޅުނު މީހުންވެސް މިހާރު އިންޖީލާ ދުރަށް ގޮސްފައިވާ ކަމަށެވެ.
އަދަދުން ބަލާއިރު މިއީ 13 މިލިއަނެއްހައި މީހުންނެވެ.
މިއާއެކު ފައްޅިއަށް ދާމީހުންގެ އަދަދުވެސް ވަނީ ދަށަށް ގޮސްފައެވެ. ކޮރޯނާގެ ބައްޔަށްފަހު ފައްޅިތައް ހުޅުވާލުމުންވެސް ކުރިން އާދަވެގެން ފައްޅިއަށް އައިސް އުޅުނު މީހުންގެ ތިބައިކުޅަ އެއްބައި އަނބުރައި ފައްޅިއަށް ހާޒިރު ނުވާކަމަށް ޕިއު ރިސާޗް ސެންޓާގެ ސާވޭއަކުން ދައްކައެވެ. ބައެއް މީހުން ވަނީ އޮންލައިންކޮށް ފައްޅީގެ އަޅުކަމުގައި ބައިވެރިވެފައެވެ. ނަމވެސް ގިނަ މީހުން ވަނީ އެއްކޮށް ފައްޅިއާ ބީރައްޓެހި ވެފައެވެ.
