އެމެރިކާގެ ޖޯރޖިއާގެ ޑިކާލްބް ޖަލުގައި މުސްލިމުންނަށް ހަލާލު ކާނާ ދިނުމަށާއި ހާރުކެއުމަށާއި އިފްތާރަށް ގަޑިއަށް ކާން ދިނުމަށް ދެކޮޅު ހެދި މައްސަލާގައި ޖަލާ ދެކޮޅަށް ކުރި ދައުވާ މުސްލިމުން ކާމިޔާބު ކޮށްފިއެވެ.
އިއްޔެ ކޯޓުން ކުރި ހުކުމުގައި ބުނެފައި ވަނީ ބަންދު ކޮށްފައި ތިބި މުސްލިމުންނަށް ޔަހޫދީ ގައިދީންނަށް ދޭ ގޮތަށް ކޯޝަރު ކާނާ ދޭން ޖެހޭނެ ކަމަށެވެ.
ޔަހޫދީ ކޯޝަރު ކާނާއަކީ މުސްލިމުންގެ ޙަލާލު މިންގަނޑަށް ފެތޭ ގޮތަށް ތައްޔާރުކޮށްފައި ހުންނަ ކާނާއެވެ. އަދި ހާރު ކެއުމަށް ދޭ ކޮއްތު، ފަތިސް ނަމާދަށް ގޮވުމުގެ އެއް ގަޑި އިރުކުރިން ދިނުމަށާއި އިފްތާރު ކޮއްތު، މަޣްރިބް ނަމާދުގެ ދިހަ މިނެޓް ކުރިން ގެންގޮސް ދިނުމަށެވެ.
މީގެ އިތުރުން މުސްލިމު ގައިދީން ތިބޭ ގޮޅިތަކަށް ކޮންމެ ނަމާދު ގަޑިއެއްގައިވެސް ބަންގި އިއްވުމަށްވެސް އަމުރު ކޮށްފައި ވެއެވެ.
