އެމެރިކާގެ ރައީސްގެ މަގާމާ ޙަވާލުވެ ވަޑައިގެން ބައިޑަން ވަނީ މުސްލިމުންގެ ހައްގުތައް ރަނގަޅު ކުރެއްވުމަށް ބައެއް މަސައްކަތްތައް ކުރައްވާފައެވެ. ބައިޑެން މަގާމާ ޙަވާލުވެ ވަޑައިގަތީ 20 ޖަނަވަރީ 2021 ވަނަ ދުވަހުގެ މެންދުރު ފަހުއެވެ.
އޭނާގެ ވެރިކަމުގައި މުސްލިމުންނަށް ފަހިކޮށްދެއްވި ކަންތައްތަކާއި މުސްލިމުންނަށް ފަހިވާ ގޮތަށް ކޮށްދެވިފައި ނުވާކަންތައްތަކަށް ބަލާލާނަމެވެ.
1. ބައިޑެންގެ ކުރިން ހުންނެވި ތައައްސުބުން ފުރިފައިވާ ޓްރަމްޕް ވަނީ އެފްރިކާ މީހުންނާއި މުސްލިމުންނަށް އެމެރިކާއަށް ވަނުން މަނާ ކޮށް ފިޔަވަޅުތަކެއް އަޅާފައެވެ. ބައިޑެން ވަނީ މި ފިޔަވަޅުތައް އުވާލައްވާފައެވެ.
2. ބައިޑެން ވަނީ އެމެރިކާގެ ސަރުކާރުގެ ވަޒީފާތަކުގައި މުސްލިމުންނަށް ފުރުސަތު ދެއްވާފައެވެ. މަތީ ފެންވަރުގެ މަގާމުތަކަށް މުސްލިމުން އޭނާ އައްޔަން ކުރެއްވިއެވެ. އޭގެ ތެރޭގައި ފެޑެރަލް ޓްރޭޑް ކޮމިޝަންގެ ރައީސްގެ މަގާމަށް ލީނާ ޚާން، ނޭޝަނަލް އިކޮނޮމިކް ކައުންސިލްގެ ޑެޕިއުޓީ ޑިރެކްޓަރުގެ މަގާމަށް ސަމީރާ ފަޒީލީ، ވައިޓް ހައުސްގެ އޮފީސް އޮފް ލެޖިސްލޭޓިވް އެފެއާޒްގެ ޑެޕިއުޓީ ޑިރެކްޓަރުގެ މަގާމަށް ރީމާ ޑޯދީން އަދި އެމްބެސެޑަރ އެޓް ލާޖް ފޯ އިންޓަނޭޝަނަލް ރިލިޖަސް ފްރީޑަމްގެ މަގާމަށް ރަޝާދު ހުސައިން ހިމެނެ އެވެ. މި ނުކުތގައި ބައިޑެން ފެއިލް ވެފައި ވަނީ ކެބިނެޓްގެ ވަޒީރު ފެންވަރުގައި މުސްލިމަކު އައްޔަން ނުކުރެއްވުމުންނެވެ.
3. އުއިގޫރު މުސްލިމުންގެ ހައްގުތައް ޙިމާޔަތް ކުރުމަށް އެމެރިކާ ސަރުކާރުން ވަނީ ގާނޫނެއް ފާސްކޮށްފައެވެ. ތައައްސުބުން ފުރިފަވައިވާ ޓްރަމްޕްގެ ވެރިކަމުގައި ސިއްރިއްޔާތުގައި އޭނާ ވަނީ އުއިގޫރު މުސްލިމުންނަށް އިހާނެތިކޮށް ހިތުމަށް ތައުރީފް ކޮށްފައެވެ. ނަމަވެސް ބައިޑެން ވަނީ ފާޅުގައި ޗައިނާގެ ހުރަގޭގައި މުސްލިމުން ބަންދު ކުރުމުގެ ސިޔާސަތަށް ދެކޮޅު ހައްދަވާފައެވެ.
4. ބައިނަލްއަގްވާމީ ފެންވަރުގައި އަށަގެންފައިވާ އިސްލާމޯފޯބިއާގެ މައްސަލަ ހައްލު ކުރުމަށް ބައިޑެން މާ ބޮޑު މަސައްކަތެއް ނުކުރައްވައެވެ. ޔަހޫދީންނާ ދެކޮޅުވެރިކަމާ ބެހޭ ކޮމިޝަނަރަކަށް މަސްއޫލުވެރިއަކު އައްޔަން ކުރެއްވި އިރު މުސްލިމުންގެ ހައްގުގައި މިފަދަ ކަމެއް ނުކުރައްވައެވެ. ނަމަވެސް ގާނޫނަކުން މިކަން ހައްލު ކުރުމަށް އެމެރިކާގެ ކޮންގްރެސްގެ ދަށުގެ އިން ކުރި މަސައްކަތުގައި ބިލެއް ވަނީ ފާސްކޮށްފައެވެ. ނަމަވެސް ސެނެޓުން މި ބިލް ފާސްވުމުން ނޫނީ ގާނޫނަކަށް ނުވާނެއެވެ. އަދި ސެނެޓުން މިބިލް ފާސް ނުވެއްޖެނަމަ ބައިޑެންގެ ރިއާސީ ބާރުން މިފަދަ މަސައްކަތެއް ކުރައްވަފާނެތޯ ސުއާލު އުފެދެއެވެ.
5. ބައިޑެން ވަނީ އަފްޣާނިސްތާންގައި އަބަދަށް ދެމިގެން ދިޔަ އެމެރިކާ ހަނގުރާމަ ހުއްޓޫވާފައެވެ.
6. އެމެރިކާގެ ފުލުހުންގެ ދާއިރާ އިސްލާޙު ކުރައްވާނެ ކަމަށް ބައިޑެން ވިދާޅުވިނަމަވެސް އެކަން ކުރެވިފައެއް ނުވެއެވެ. ޖޯރޖް ފްލޮއިޑް ޖަސްޓިސް އެންޑް ޕޮލީސިންގ އެކްޓް ވަނީ ކޮންގްރެސްގެ ދަށު ގޭގައި ދެ ފަހަރަށް ބަހުސް ކޮށް ފާސްކޮށްފައެވެ. ނަމަވެސް ސެނެޓުގައި ތާށި ވަނީއެވެ. މިކަން ހައްލު ކުރެއްވުމަށް ބައިޑެން ބާރެއް ނައަޅުއްވައެވެ.
7. ސަލާމަތީ ފަރާތްތަކުން އަނިޔާ ލިބިފައިވާ އެމެރިކާގެ މުސްލިމުން ބިރު ސަލާމަތް ކޮށްދެއްވާނެ ކަމަށް ވައދު ވެވަޑައިގެންނެވި ނަމަވެސް މިއދާ ހަމައަށް މުސްލިމުންނާ ސަލާމަތީ ބާރުތަކުން ގުޅުން ރަގަޅު ކުރުމަށްޓަކައި ސަރުކާރުން މަސައްކަތެއް ކޮށްފައެއް ނުވެއެވެ.
8. އެމެރިކާގެ މުސްލިމު ކޮމިއުނިޓީއާ ސަރުކާރާ ދެމެދު ލިއޭޒަން ކުރުމަށް މަސްއޫލު ވެރިއަކު ހަމަޖެއްސުމަކީ އޭނާގެ ވައުދެއް ކަމުގައި ވިއަސް އެކަން ކުރައްވާފައެއް ނުވެއެވެ. އެމެރިކާގެ އާބާދީގައި މުސްލިމުންނާ އެއްވަރުގެ އަދަދެއް ކަމުގައިވާ ޔަހޫދީންނާ ސަރުކާރާ ދެމެދު ލިއޭޒް ކުރުމަށް ވައިޓް ހައުސްއިން މަސްއޫލުވެރިއަކު ހަމަޖައްސާފައި ހުރެއެވެ.
9. އެކި ގައުމުތަކުގައި މުސްލިމުންނާ މެދު އިހާނެތިކޮށް ހަދަމުންދާ މައްސަލަ ބައިޑެންގެ ސަމާލުކަމަށް ތަކުރާރުކޮށް ގެނަސްފައިވީ ނަމަވެސް ބައިޑެން އެގައުމުތަކަށް އެއްޗެއް ވިދާޅުވެފައެއް ނުވެއެވެ. އަދި އެމައްސަލާގައި މަސައްކަތެއް ކުރައްވާފައެއްވެސް ނުވެއެވެ.
10. މެދުއިރުމަތީގައި އެމެރިކާއާއެކު ވިޔަފާރި ކުރާ ގައުމުތަކުގައި އިންސާނީ ހައްގުތަކުގެ މައްސަލަތައް އިންތިހާއަށް ގޯސްވަމުންދާއިރުވެސް އެކަމަށް ބައިޑެން ފަރުވާލެއް ބަހައްޓަވާފައެއް ނުވެއެވެ.
