މިސްރުގެ ރައީސް އަބްދުލް ފައްތާހު އަލްސީސީގެ އާ ވެރިރަށުގެ ވިދާ ބަބުޅާ ޓަވަރު ބްލޮކްތަކާއި ހައިޓެކް ފެސިލިޓީތަކަކީ މިސްރުގެ އަސްލު ވެރިރަށް ޤާހިރާގެ ތޮއްޖެހިފައިވާ މަގުތަކާއި އާސާރީ އަދި ބޯދާ އިމާރާތްތަކާ މުޅިންވެސް ތަފާތު ސިޓީއެކެވެ.
ހަނަފަސް ސަހަރާއެއްގައި ބައްޓަންވެ ސިފަޖެހެމުން އަންނަ އައު އެޑްމިނިސްޓްރޭޓިވް ކެޕިޓަލްގައި ވައިފައި ހޮޓްސްޕޮޓްގެ ގޮތުގައި މަގުމަތި ދިއްލާ ދަނޑިތައް ދެގުނައަށް އިތުރުކޮށްފައި ވެއެވެ. އިމާރާތްތަކަށް ވަދެވޭނީ ކީ ކާޑުތަކުންނެވެ. އެ ސިޓީގައި ދިރިއުޅޭ 6.5 މިލިއަން މީހުންނަށް ފާރަވެރިވާ 6،000 އަށް ވުރެ ގިނަ ސަވައިލެންސް ކެމެރާ ހަރުކޮށްފައި ވާނެއެވެ.
ރައްޔިތުންނަށް ކަރަންޓާއި ފެނާއި ކުނީގެ ޚިދުމަތަށް ޔުޓިލިޓީ ޕޭމަންޓް ދެއްކުމަށް ޚާއްސަ މޯބައިލް އެޕް ބޭނުން ކުރަން ޖެހެއެވެ. މައްސަލަތަކާއި ޝަކުވާތައްވެސް ރަޖިސްޓްރީ ކުރެވޭނީ މޯބައިލް އެޕުންނެވެ. މިފަދަ ފީޗާތަކުގެ ސަބަބުން އާންމު ދިރިއުޅުމަށް ފަސޭހަވާނެ ކަމަށް ބައެއް މީހުން ބުނާ އިރު އަނެއް ބަޔަލު ބުނަނީ ސީސީގެ 10 އަހަރުގެ ވެރިކަމުގައި ޚިޔާލުތަފާތުވުމާއި މިނިވަން ވާހަކަ ދެއްކުމަށް ފުޅާ ދާއިރާއެއްގައި ފިޔަވަޅު އަޅާފައިވުމުން ކެމެރތަކުން ފާރަވެރި ވުމުން އަސާސީ ހައްގު ގެއްލޭނެ ކަމަށެވެ.
ހަލިނިއުސްގެ އާކައިވްއިން ކިޔާލުމަށް:
މިސްރުގެ އައު ވެރިރަށް ސްމާޓް ސިޓީއެއް
މިސްރުގެ އައު ވެރިރަށަށް ސަރުކާރު އޮފީސްތައް ބަދަލު ކުރަނީ
އަބޫދާބީން ފެށިގެން ޓިއުނީޝިއާއާ ހަމައަށް ވެސް މިފަދަ ސްމާޓް ސިޓީ މަޝްރޫއުތަކެއް ކުރިއަށް ގެންދަނީ ޖަރީމާތައް މަދުކޮށް ވަޒީފާގެ ފުރުސަތު ރަނގަޅުކޮށް، ހެޔޮ ވެރިކަމެއް ކުރުމަށްޓަކައި އާޓިފިޝަލް އިންޓެލިޖެންސާއި، ސެންސަރުކުރުމާއި، މޫނު ދެނެގަތުމާއި މެޝިން ލާނިން ފަދަ ޒަމާނީ ޓެކްނޮލޮޖީތައް އެއްކޮށްލައިގެން ކަމަށް ސަރުކާރުތަކުން ބުނެއެވެ. މިކަން ކުރާއިރު ސަރުކާރުތަކުން ބަރޯސާވަނީ އާންމު ޔޫޒަރުންނަށް ނޭނގި ނުވަތަ ރުހުމެއް ނެތި ގިނަ އަދަދަކަށް ޕާސަނަލް ޑޭޓާ އެއްކުރުމާއި ޕްރޮސެސް ކުރުމުގައެވެ.
ޚުދުމުޚުތާރު ސަރުކާރުތަކުގައި އެ ނުރައްކާ ބޮޑެވެ.
ހުޅަނގުގެ ގައުމުތައް ފިޔަވައި އެހެން މީހުން ކުރާ މިފަދަ ކަންކަމަށް ހުޅަނގުގެ ސަރުކާރާއި މީޑިއާއާއި ޖަމުއްިޔާތަކުން އެކި ބަހަނާތަކުގައި ބޮޑުވާ ބިއްލޫރި އަޅައިގެން ބަލައި ކުށްތައް ހޯދައެވެ.
"މިސްރު ސަރުކާރުން އިޝްތިހާރު ކުރަނީ އެގައުމުގެ އާ އެޑްމިނިސްޓްރޭޓިވް ކެޕިޓަލް އަކީ މީހުންގެ ދިރިއުޅުމުގެ ފެންވަރު ރަނގަޅު ސްމާޓް ސިޓީއެއްގެ ގޮތުގައި - އެކަމަކު ހަގީގަތުގައި އެމީހުން ބިނާކުރަނީ ސަވައިލެންސް ސިޓީއެއް،" ތޮމްސަން ރޮއިޓާސް ފައުންޑޭޝަނުން ކުރި ރިޕޯޓެއްގައި ދެކޮޅުވެރި ފަރާތްތަކާ ހަވާލާދީ ބުނެފައި ވެއެވެ.
މިސްރުގެ އައު ވެރިރަށް އަލްޤާހިރާ އަލްޖަދީދާއަކީ މިސްރުގައި ގާތްގަނޑަކަށް ދިހަވަރަކަށް އާ ސްމާޓް ސިޓީ ޕްރޮޖެކްޓްތަކުގެ ތެރެއިން އެއް މަޝްރޫއެވެ. މިއީ 700 އަކަ ކިލޯމީޓަރު (270 އަކަ މޭލުު) ސަރަހައްދަކަށް ފެތުރިފައިވާ މަޝްރޫއެކެވެ. ހައުސިން މިނިސްޓްރީތަކާއި ފައިނޭންޝަލް އިންސްޓިޓިއުޝަންތަކާއި ފޮރިން އެމްބަސީތަކުން އެ ސިޓީގައި އެތަންތަނަށް ބިން ހޯދައި އިމާރާތްކޮށްފައި ވެއެވެ.
މިސްރުގެ އައު ވެރިރަށުގެ ސަވައިލެންސް ކެމެރާ ސިސްޓަމަކީ އެމެރިކާގެ ކުންފުންޏެއް ކަމަށްވާ ހަނީވެލް އިން އުފައްދާފައިވާ ސިސްޓަމެކެވެ.
ކެމެރާ ނެޓްވޯކަށް ކޮމާންޑް އެންޑް ކޮންޓްރޯލް ސެންޓަރަކުން "އެއްވެ އުޅޭ މީހުންނާއި ޓްރެފިކް ތޮއްޖެހުން މޮނިޓަރކޮށް، ވައްކަމުގެ ހާދިސާތައް ދެނެގަނެ، ޝައްކު ކުރެވޭ މީހުން ނުވަތަ ތަކެތި ބަލައި، ކުއްލި ހާލަތްތަކުގައި އޮޓޮމެޓިކް އެލާމް އެޅުމަށް ތަޖުރިބާކާރު ވީޑިއޯ އެނަލިޓިކްސް ބޭނުންކުރާނެ" ކަމަށް މިސްރުން ބުނެއެވެ.
ހަނީވެލް އިން "އެޑްވާންސްޑް އިންޓަނެޓް އޮފް ތިންގްސް ސޮފްޓްވެއާ އަދި ހާޑްވެއާ ސޮލިއުޝަންސް ބޭނުންކުރާނީ ޔުނިފައިޑް ޕަބްލިކް ސޭފްޓީ ސާވިސަސް ފޯރުކޮށްދޭ ހޯލިސްޓިކް ސިޓީއަކަށް އެތަން ހެދުމަށްް" ކަމަށް އެކުންފުނިން ބުނެފައިވެ އެވެ.
އޮފިޝަލުން ވަނީ މި ސަވައިލެންސް ޓެކްނޮލޮޖީގެ މަގުސަދަކީ ކުށްކުރާ މީހުން ދެނެގަނެ ރައްކާތެރިކަން އިތުރުކޮށް މިސްރުގެ ގާނޫނާއި ބައިނަލްއަގްވާމީ މިންގަނޑުތަކާ އެއްގޮތަށް ޑޭޓާ ހިމާޔަތްކުކުރުން ކަމަށެވެ.
އައު ވެރިރަށަކީ އަސްލު ވެރިރަށް ޤާހިރާގެ އިރުމަތީން ގާތްގަނޑަކަށް 45 ކިލޯމީޓަރު (28 މޭލު) ދުރުގައި އަލަށް ބިނާ ކޮށްފައިވާ ސިޓީއެކެވެ.
މިސިޓީ ބިނާ ކުރުމުގެ ޚަބަރުތައް ހަލި ނިއުސްއިން ގެނެސްދީފައި ވާނެއެވެ.
