ސައިބާ އެޓޭކެއްގައި ބޮޑެތި ވެބްސައިޓްތައް ހުއްޓުމަކަށް ގެނަސްފިއެވެ. ބުރާސްފަތި ދުވަހު ބައެއް ވެބްސައިޓްތަކަށް ދީފައިވާ ހަމަލާގައި ވެބްސައިޓްތަކަށް ވަންނަން ބޭނުންވި މީސްމީހުންނަށް ހުރަސްއެޅި، ޑީއެންއެސް އެރަރ ދައްކާފައި ވެއެވެ. ހަމަލަތައް އަމާޒު ކުރެވުނު ވެބްސައިޓްތަކަކީ، އެމެޒޯންއާއި ފެޑެކްސްއާއި އެއަރބީއެންބީއާއި ޔޫޕީއެސްއާއި އެޗްއެސްބީ ބެންކާއި ބްރިޓީޝްއެއަރވޭޒްގެ ވެބްސައިޓްތަކެވެ. މިނޫން އެހެން އިތުރު ވެބްސައިޓްތައްވެސް ހިމެނިދާނެ ކަމަށް ބެލެވެއެވެ.
- ގުޅުން ހުރި މަޢްލޫމާތު:
ނޯރވޭގެ ޕާލަމެންޓަށް ދިން ސައިބާ އެޓޭކާ ގުޅިގެން ޗައިނާ ސަފީރު ހާޒިރުކުރުން
ވެބްސައިޓްތައް މޮނީޓާކުރާ ޕްލެޓްފޯމް ޑައުން ޑިޓެކްޓަރ އިން ބުނެފައިވަނީ، އެތަކެއް ހާސް ވެބްސައިޓްތަކަށް މައްސަލަ ދިމާވި ކަމަށެވެ.
ދެކުނު އޭޝިއާ ސަރަހައްދުން ޙަމަލަތައް އަމާޒުވިކަމަށް ވަނީ އިންޑިއާގެ އޮންލައިން ފުޑްޑެލިވާ ކުރާ ޒޮމާޓޯއަށެވެ.
މަޢުލޫމާތުގެ ރަސްމަގުގައި މަގުފޭރުމާއި، ހަމަލަތައް ދިނުން އާންމު ވުމާގުޅިގެން މިހަމަލަތައް ހުއްޓުވުމަށް އދން ވަނީ މަސައްކަތްތަކެއް ފަށާފައެވެ.
އެންމެފަހުން މިފަދަ ޙަމަލައެއްގައި ނޯރވޭއިން ވަނީ ޗައިނާ ސަފީރު އެގައުމުގެ ފޮރިން މިނިސްޓްރީއަށް ހާޒިރުކޮށް ޗައިނާ އިން ނޯރވޭގެ ޕާލަމެންޓް ސާވަރތަކަށް ދިން ސައިބާ ޙަމަލަ ކުށްވެރިކޮށް، އެފަދަ ކަމެއް ތަކުރާރުވިޔަ ނުދިނުމަށް ނަސޭހަތްތެރި ވެފައެވެ.
