ވާލު ރޯގާ ޖައްސާ ވައިރަސް އުފެއްދުމަށް ޗައިނާއަށް ފައިސާ ދިނީ އެމެރިކާއިން ކަމަށް އެމެރިކާގެ ކޮންގްރެސްގެ މެމްބަރަކު ވިދާޅުވެއެވެ. ރިޕަބްލިކަން ޕާޓީގެ ސެނެޓަރ ރޭންޑް ޕައުލް ވިދާޅުވަނީ، އެމެރިކާއިން ދީފައިވާ ފައިސާ ބޭނުންކޮށްގެން ޗައިނާގެ ވޫހާން އިންސްޓިއުޓް އޮފް ވައިރޮލޮޖީން ވާލުގައި ހުންނަ ކޮރޯނާ ވައިރަސް ޖަރާސީމު، އިތުރަށް ބާރުގަދަ ކުރުމަށް ޓެސްޓްތައް ހަދާފައިވާ ކަމަށެވެ.
ގުދުރަތީ ގޮތުން ދިރޭ މަޚުލޫގެއްގައި އަށަގެންފައިވާ ޖަރާސީމު ނަގައިގެން ޓެސްޓްތައް ހަދައި އެ ޖަރާސީމަށް ބަދަލު ގެނައުމަކީ ލެބޯޓްރީތަކުގައި އާންމުކޮށް ކުރާ މަސައްކަތެކެވެ. ސައިންޓިސްޓުން ބުނާ ގޮތުން މިފަދަ ޓެސްޓްތަކުން އެ ޖަރާސީމުތައް މަސައްކަތް ކުރާ ގޮތާއި އޭގެ ނުރައްކަލާއި އޭގެ ދިފާއަށް މަސައްކަތް ކުރާނެ ގޮތްތަކަށް ސައިންޓިސްޓުން އަހުލުވެރި ވެގެން ދެއެވެ.
އެމެރިކާ ސަރުކާރުގެ ފައިސާވެސް ބޭނުންކޮށްފައި ވަނީ މިފަދަ ގޮތަކަށެވެ. އެމެރިކާ ސަރުކާރުން ދިން މިފައިސާ ޗައިނާގެ އިންސްޓިއުޓަށް ދިން ފަރާތަކީ ކޮރޯނާ ވައިރަސްއާ ގުޅިގެން އެމެރިކާ ސަރުކާރުން ކުރާ މަސައްކަތުގައި އިސްކޮށް އުޅުއްވާ އެންތޮނީ ފައުޗީއެވެ. އޭނާ އަކީ ބައިޑެންގެ ސަރުކާރުގެ ކޮވިޑް19އާ ގުޅޭ އިސް ލަފާދާރެވެ.
އެންތޮނީ ފައުޗީ އަކީ، އެމެރިކާގެ ނޭޝަނަލް އިންސްޓިއުޓް އޮފް އެލަރޖީ އެންޑް އިންފެކްޝަސް ޑިޒީޒްގެ ރައީސެވެ. އެމެރިކާ ސަރުކާރުން މި އިންސްޓިއުޓަށް ދިން ފައިސާގެ ތެރޭން އެއްބަޔަކީ ނޭވާލުމުގެ ނިޒާމަށް ޖެހޭބަލިތައް ދިރާސާކުރުމަށް ކަނޑައެޅި ފައިސާއެވެ.
ފައުޗީގެ އޮފީހުން ވަނީ ދިރާސާތައް ކުރުމަށް 2014 ވަނަ އަހަރު ނިއުޔޯރކްގެ އީކޯހެލްތު އެލައެންސަށް 3.7 މިލިއަން ޑޮލަރު ދީފައެވެ. މި ކުންފުނިން ވަނީ މިފައިސާއިން ހަ ލައްކަ ޑޮލަރު، ޗައިނާގެ ވޫހާން އިންސްޓިއުޓް އޮފް ވައިރޮލޮޖީއަށް ދީފައެވެ.
ފަސް އަހަރު ދުވަސްވަންދެން ދިރާސާކުރުމަށް ޙަވާލު ކުރި ޕްރޮޖެކްޓްގެ މުއްދަތު ހަމަވުމުން އިތުރު ފަސް އަހަރު ދުވަހުގެ ދިރާސާއަށް އެއްބަސްވުން އައުކޮށްފައި ވަނީ 2019ގައެވެ. ފަހުން ކޮރޯނާ ވަބާ ފެތުރި ދުނިޔެ ހުއްޓުމަކަށް އައުމުން މަސައްކަތް ހުއްޓި މި އެއްބަސްވުން ވަޅުޖެހުނީއެވެ.
ސެނެޓަރ ރޭންޑް ޕައުލް މިހަފްތާގައި ކޮންގްރެސްގައި އެންތޮނީ ފައުޗީއާ ކުރިމަތި ކުރެއްވި ސުއާލަކީ، ކޮންގްރެސްއަށް ދޮގު މައުލޫމާތު ދެއްވުމަކީ ކުށެއްކަން އެނގިވަޑައިގަންނަވަން ހެއްޔެވެ؟
އެމެރިކާ ފަައިސާ ބޭނުން ކުރި ގޮތް މިނޫހުން ގެނަސްދީފައިިވާ ލިޔުންތަކުގައި:
ވާލުރޯގާ އުފެދުނީ ކޮން ހިސާބަކުން ބާ؟
ކޮވިޑް19 ވައިރަސް އުފެއްްދީ ލެބޯޓްރީގައި ކަމަށް ވޮޝިންޓަން ޕޯސްޓުން ބުނޭ
އެމެރިކާގެ ދެ ޔުނިވަރސިޓީއަކާއި ވޫހާން ލެބާ ގުޅިގެން ތައްޔާރުކޮށް ޝާއިއުކޮށްފައިވާ ދެ ދިރާސާ ކަރުދާހަކުން ދައްކަނީ ވޫހާން ލެބޯޓްރީގައި ވާލުގެ ޖަރާސީމަށް ބަދަލު ގެނަސް ގުދުރަތީ ޖަރާސީމު އިތުރަށް ބާރުގަދަ ކުރުމަށް ޓެސްޓްތައް ކޮށް އެ ޓެސްޓްތައް ކާމިޔާބު ވެފައިވާ ކަމަށެވެ.
އެމެރިކާގެ ޓްރަމްޕް ސަރުކާރުންވެސް އަދި ބައިޑެންގެ ސަރުކާރުންވެސް ބުރަ ވަނީ ދުނިޔެއަށް ވަބާއަކަށް ވެފައިވާ ކޮވިޑް19އަކީ ވޫހާން ލެބުން ފޭދިގެން އުޅޭ ވައިރަސްއެއް ކަމަށެވެ. އެންތޮނީ ފައުޗީގެ ވާހަކަތަކުން ދޭހަވަނީ ވޫހާން ލެބަށް ބަދު ބަސް ބުނުމުގައި އޭނާ ފަހަތު ފަޔަށް ބުރަވާކަމަށެވެ.
އެމެރިކާގެ ވޮޝިންޓަން ޕޯސްޓް ނޫހަށް، ދެއްވި އިންޓަރވިއުއެއްގައި ޗައިނާ އިންސްޓިއުޓާއެކު މަސައްކަތް ކުރެއްވި ނޯރތު ކެރޮލައިނާ ޔުނިވަރސިޓީގެ ޕްރޮފެސަރ ޑރ. ރާލްފް ބެރިކް ވިދާޅުވަނީ 2020ގައި ވަބާއަކަށް ވެގެން ފެތުރިފައިވާ ކޮރޯނާ ވައިރަސްއަކީ، 2015ގައި ސައިންޓިސްޓުން ބަދަލު ގެނައި ވައިރަސްއެއް ނޫން ކަމަށެވެ.
