ކޮވިޑް19އާ ގުޅޭ މުހިންމު މަޢުލޫމާތެއް ދުނިޔޭގެ އެންމެ އިސް ސައިންސް މަޖައްލާއިން ސިއްރުކުރިކަން ބޭޒާރުކޮށްފިއެވެ. ޗައިނާގެ ވޫހާންގައި ކޮވިޑް19 ފެތުރެމުން ދިޔަތާ ކުރީކޮޅު، އެވައިރަސްއަކީ އިންސާނުންގެ މެދުގައި ގައިންގަޔަށް އަރަމުންދާ ވައިރަސްއެއް ކަމަށް ބުނެ، ލިޔުނު ފުރަތަމަ މަޒުމޫނު ލެންސެޓް ޖަރނަލް އިން ސިއްރުކުރުމުން މީހުންގެ ފުރާނަ ނުރައްކަލަށް ހުށަހެޅިގެން ދިޔައީ ކަމަށް ތުހުމަތު ކުރެވެއެވެ.

ސުއާލު އުފެދިފައިވާ މައްސަލާގައި ބަހުސް ކުރެވޭ މަޒުމޫނުގައި ހިމަނާފައިވާ ވާހަކަތަކުގެ ތެރޭގައި ހިމެނެނީ، ޗައިނާގެ އެހެން ސިޓީއަކުން ވޫހާންއަށް ތިމާގެ މީހުންގެ ގާތަށް ޗުއްޓީއަށް ދިޔަ ބަޔަކަށް އެ އާއިލާގެ ތެރޭން ކޮވިޑް19 ޖެހުނު ވާހަކައެވެ. އަދި މިމީހުންނަށް ކޮވިޑް19 ޖެހުނު އިރު މިއާއިލާގެ އެއްވެސް މީހަކު ވޫހާންގެ ވާލާއި ވަލު ޖަނަވާރު ވިއްކާ މާރުކޭޓަށް ޒިޔާރަތް ކޮށްފައެއް ނުވެއެވެ. އަދި މިމީހުންގެ ތެރޭން ހަސްފަތާލަށް ދިޔަ ބަޔަކަށްވެސް ކޮވިޑް19 ޖެހުނު ކަމަށާއި، ވޫހާންގެ ހަސްފަތާލެއްގެ ދެ ފަންގިފިލާގައި ޑޮކްޓަރުންނާއި ނަރުހުންނާއި ހަސްފަތާލުގެ ސްޓާފުންނަށް ކޮވިޑް19 ޖެހިގެން ފަރުވާ ދިންކަމަށް ބުނެފައި ވެއެވެ.

ޑެއިލީ މެއިލްއިން ބުނާ ގޮތުން، މިވާހަކަތައް ހިމަނާފައިވާ މަޒުމޫނު، ލެންސެޓް މަޖައްލާއިން އިތުރު މުޠާލިއާކުރުމަށް ފޮނުވީ ނެދަރލެންޑްސްގެ ސައިންޓިސްޓަކަށެވެ. މި ވަބާގެ ނުރައްކާ އޭނާއަށް އިޙުސާސްވެގެން މި ދިރާސާ މަޒުމޫނު އަވަހަށް ލެންސެޓްގައި ޝާއިއުކުރުމަށް އަވަހަކަށް އޭނާގެ މުޠާލިއާކުރުން ނިންމައި އަނބުރާ ފޮނުވިއެވެ. ނަމަވެސް 24 ގަޑިއިރު ވެގެން ދިޔައިރުވެސް ލެންސެޓުން މަޒުމޫނު ޝާއިއު ނުކުރުމުން، ނެދަރލެންޑްސްގެ ސައިންޓިސްޓް ވަނީ މިވާހަކަ އިނގިރޭސިވިލާތުގެ ވެލްކަމް ޓްރަސްޓްގެ ޑިރެކްޓަރ ސަރ ޖެރްމީ ފެރަރގެ ސަމާލުކަމަށް ގެނަސްފައެވެ. އޭނާވެސް ޑަބްލިއުއެޗްއޯގައި އުޅޭ ރައްޓެއްސެއް މެދުވެރިކޮށް މިކަން އެޖަމުއިއްޔާގެ ސަމާލުކަމަށް ގެނައެވެ.

މި ވާހަކަތަކަށް 24 ގަޑިއިރު ވީފަހުން، ޗައިނާއިން ބުނެފައި ޗައިނާގެ ސިއްޙީ ޚިދުމަތުގައި އުޅޭ ބައެއް މީހުންނަށް ކޮވިޑް19 ޖެހިފައި ވާކަމަށެވެ. އަދި އިންސާނުންގެ ތެރޭގައި ގައިންގަޔަށް ކޮވިޑް19 ފެތުރެމުންދާ ކަން ރަސްމީކޮށް ޗައިނާއިން އެއްބަސްވީ އެއަށްފަހުންނެވެ.

މި މަޒްމޫނުގެ އިތުރުން ޗައިނާއިން އުއިގޫރު މީހުންގެ އިންސާނީ ހައްގަށް އަރައިގަންނަކަމަށް ބުނެ، ލެންސެޓްގައި ޝާއިއުކުރަން ފޮނުވި މަޒްމޫނެއްވެސް ލެންސެޓުން ސިއްރުކުރިކަމަށް ޔޫކޭގެ ދަ މެއިލް އޮން ސަންޑޭ އިން ވަނީ ރިޕޯޓްކޮށްފައެވެ.

އިތުރު ތިން ވަނަ މައްސަލައެއްގައި ލެންސެޓަށް ފާޑުކިޔާފައި ވަނީ ކޮވިޑް19 ގެ ހަގީގަތް އޮޅުވާލުމަށް މަސައްކަތް ކުރާ އެމެރިކާގެ ޕީޓާ ޑެޒާކް މީހަކު ލައްވައި ލިޔުއްވާފައިވާ މަޒްމޫނެއް އެ މަޖައްލާގައި ޝާއިއު ކުރުމުންނެވެ.

ޕީޓާ ޑެޒާކްއަކީ، އެމެރިކާ ސަރުކާރުން ކޮރޯނާ ވައިރަސްގެ ދިރާސާއަށް ދިން ފައިސާގެ ތެރޭން ހަ ލައްކަ ޑޮލަރު ޗައިނާގެ ވޫހާން ލެބަށް ދީގެން ކޮވިޑް19 ޖައްސާ ވައިރަސް، ފުއްޕާމޭގެ ސެލްތަކުގައި ގަދައަށް ތަތްލައްވާ ގޮތަށް، ވާލުގައި އުޅޭ ގުދުރަތީ ކޮރޯނާ ވައިރަސްއަށް ބަދަލު ގެނައުމުގެ މުގުލުގައި ހުރި މީހާއެވެ.

ޕީޓާ ޑެޒާކްގެ ކުންފުންޏަށް ފައިސާ ދިނީ، އެމެރިކާގެ ރައީސްގެ ކޮރޯނާ ވައިރަސްއާ ބެހޭ ލަފާދާރު އެންތޮނީ ފައުޗީ އިސްވެ ހުންނަވާ އެމެރިކާގެ ނޭޝަނަލް އިންސްޓިއުޓް އޮފް އެލަރޖީ އެންޑް އިންފެކްޝަސް ޑިޒީޒް އިންސްޓިއުޓުންނެވެ.

ކޮވިޑް19 އާއި ޕީޓާ ޑެޒާކްއާއި ފައުޗީއާ ގުޅޭ ލިޔުންތައް:

އެންތޮނީ ފައުޗީ އިސްވެ ހުންނަވާ ވައިރަސް ތަހުލީލުކުރާ އިދާރާއިން ކޮރޯނާ ވައިރަސްއާ ގުޅޭ ދިރާސާ ހެދުމަށް ދިން ފައިސާ ލިބިގަތް ސައިންޓިސްޓް ޕީޓާރ ޑެޒާކްވެސް މި ވަފްދުގައި ހިމެނުނެވެ.

އޭނާގެ ލަފައަކީ ކޮރޯނާ ވައިރަސް އުފެދިގެން އައީ ވޫހާންގެ ލެބޯޓްރީން ކަމަށެ

ވާލު ރޯގާ ޖައްސާ ވައިރަސް އުފެއްދުމަށް ޗައިނާއަށް ފައިސާ ދިނީ އެމެރިކާއިން

ލެންސެޓު މަޖައްލާއިން އަމިއްލަ ދިފާއުގައި ވާހަކަ ދައްކަމުން ބުނެފައި ވަނީ އެމަޖައްލާއަށް ލިބޭ ހުރިހައި ޢިލްމީ ދިރާސާއެއް އެހެން ސައިޓިސްޓުން ލައްވައި މުޠާލިޢާ ކުރުވުމަށްފަހު، ޝާއިއުކުރަމުން ގެންދާ ކަމަށެވެ. އަދި އެއްވެސް މަޢްލޫމާތެއް ސިއްރު ނުކުރާ ކަމަށެވެ.

ކޮވިޑް19އާ ޗައިނާއާ ގުޅުވައިގެން އަނެއްކާވެސް ވާހަކަ ގިނަވެފައި ވަނީ، ޗައިނާއިން ޑަބްލިއުއެޗްއޯގެ އައު ތަހުގީގަށް އެއްބާރުލުން ނުދީގެންނެވެ. ޗައިނާއިން ގެންދަނީ ކޮވިޑް19ގެ ކުރީކޮޅު ނެގި ސާމްޕަލްތަކާއި އެއިރު މި ބަލި ޖެހުނު މީހުންގެ މަޢްލޫމާތު ތަހުގީގު ކުރާ ފަރާތްތަކަށް ނުދޭން ނިންމާފައެވެ.

އިތުރު ލިޔުންތައް