ކޮލޮމްބޯ ޕޯޓް ސިޓީގައި ޗައިނާއަށް ރަނުގެ ފުރުސަތެއް ފަހިވެއްޖެއެވެ. 24 މެއި 2021ގައި ސްރީލަންކާގެ ޕާލަމެންޓުން ވަނީ ކޮލޮމްބޯ ޕޯޓް ސިޓީގެ ބިލް ފާސްކޮށްފައެވެ. މި ބިލްގެ ބަހުސަށް ހޭދަވީ އެންމެ ދެ ދުވަހެވެ. ބިލް ފާސްވެފައި ވަނީ 148 ވޯޓުންނެވެ. ދެކޮޅަށް ލިބުނީ 59 ވޯޓެވެ. މި ބިލް ޕާލަމެންޓަށް އެންމެ ފުރަތަމަ ވައްދާފައި ވަނީ އެޕްރީލް 2021ގައެވެ. މި ބިލަކީ، ކޮލޮމްބޯ ޕޯޓް ސިޓީއާއި އެ ސިޓީގައި ގާއިމް ކުރާ ޚާއްސަ އިގްތިސާދީ މިނިވަން ވިޔަފާރީގެ ސަރަހައްދު ހިންގުމަށް ބޭނުންވާ އޮނިގަނޑު ގާއިމް ކުރުމާ ބެހޭ މާއްދާތައް ހިމަނާފައިވާ ބިލެއްވެސް މެއެވެ. މިބިލުން 1.4 ބިލިއަން ޑޮލަރުގެ ޕްރޮޖެކްޓް ހިންގާނެ ގޮތްތައް ބަޔާން ކޮށްފައި ވާނެއެވެ. އެސަރަހައްދުގައި ހިންގާ ކުންފުނިތަކާއި، ކުރާ ވިޔަފާރިތަކަށް ހުއްދަ ދިނުމާއި، ރަޖިސްޓްރީކުރުމާއި އަދި އެއާ ގުޅޭ އެހެނިހެން ކަންކަންވެސް އިންތިޒާމު ކުރެވިގެން ދާނީ މިބިލުންނެވެ.
މި ޚާއްސަ އިގްތިސާދީ ސަރަހައްދަކީ، 269 ހެކްޓަރުގެ ބިމެކެވެ. 27 މެއިގައި ސްރީލަންކާގެ ރައީސް ވަނީ މިބިލް ތަސްދީގު ކުރައްވާފައެވެ.
ދެދުވަހުގެ މަޝްވަރާއަށް ފަހު ޕާލަމެންޓުން މި ބިލް ފާސްކުރި ނަމަވެސް މިއީ އެހާ ފަސޭހައިން ނިމިގެން ދިޔަ ބިލެއް ނޫނެވެ. މިބިލްގައި ހިމެނިގެންވާ ކަންތައްތަކަށް ސްރީލަންކާގެ މަދަނީ ޖަމުއިއްޔާތަކުން އިޢުތިރާޟު ކުރިއެވެ. ސަރުކާރުގެ މިނިވަން އިދާރާތަކުންވެސް ދެކޮޅު ހެއްޖެވެ. ސްޕްރީމް ކޯޓާ ހަމައަށްވެސް މައްސަލަ ގެންދިޔައެވެ.
މިބިލްގައިވެސް ބައެއް ފުށުއެރުންތަކެއް ހުރިކަމަށް ސްޕްރީމް ކޯޓުންވެސް ބުންޏެވެ. އަދި މިހާރު އޮތް ގޮތަށް ފާސްކުރަނީނަމަ ސުޕަރ މެޖޯރިޓީއެއް ބޭނުންވާނެ ކަމަށާއި ނޫންނަމަ، ތިން ބައިކުޅަ ދެބައިގެ އަޣްލަބިއްޔަތަކާއި ރައްޔިތުންގެ ފެންނަ ނުފެންނަ ވޯޓެއް ބޭނުންވާނެ ކަމަށް ލަފާދިނެވެ. ސުޕްރީމް ކޯޓުން ބުނިގޮތަށް ޕާލަމެންޓުން ބަދަލުތަކެއް ގެނަސް ޕާލަމެންޓުން ބިލް ފާސްކުރީ އެވެ. ސަރުކާރުން ވަނީ މިއިން އިގްތިސާދީ ފަހިކަމެއް ގައުމަށް އަންނާނެ ކަމުގެ ޔަގީންކަން ދީފައެވެ.
އިދިކޮޅު ބައެއް ފަރާތްތަކުން ސިފަ ކުރި ގޮތުގައި ސަރުކާރުން އޮތީ ސްޕްރީމް ކޯޓުން ބިލްގެ ތެރެއަށް ވަނުމުން ނުތަނަވަސް ވެފައެވެ. ޕާލަމެންޓުން ބޭނުންވީ ބެއިޖިންއިން ބޭނުންވާ އެފަރާތް ރުހޭ ގޮތަށް ބިލް ފާސްކުރަން ކަމަށް ފާޑުކިޔާ ފަރާތްތަކުން ބުންޏެވެ.
ޗައިނާއިން ބޭނުންވާ ގޮތަށް ފަހިކޮށްދޭން ސްރީލަންކާއަށް މަޖުބޫރު ވުމަކީ މައްސަލައަކަށް ވެގެން ނުވާނެއެވެ. އެހެނީ، ސްރީލަންކާގެ ބޭރުގެ ދަރަނި ދެއްކުމަށްޓަކައި 500 ބިލިއަނެއްހައި ޑޮލަރުގެ މާލީ މަންފާތަކެއް ޗައިނާއިން ވަނީ ސްރީލަންކާއަށް ފަހިކޮށް ދީފައެވެ. އެހެންވެ، ސްރީލަންކާ އިން އެންމެ ފުރަތަމަ މި ބިލް ޕާލަމެންޓަށް ވެއްދިއިރުވެސް ވައްދާފައި ވަނީ އެގައުމުގެ އައު އަހަރުގެ ބަންދާ ދިމާކޮށެވެ. ފަސޭހައިން ފާސްކޮށްލެވޭފަދަ މިޒާޖެއްގައި ޕާލަމެންޓް އޮތް އިރެއްގައެވެ. މިބިލް ކުރިން އޮތް ގޮތުން ސްރީލަންކާ ކަސްޓަމްސްއާއި ޓެކްސް އޮތޯރިޓީގެ ބާރު، ޕޯޓް ސިޓީގައި މަސައްކަތް ކުރާ ކުންފުނިތަކުގެ މައްޗަކަށް ނުހިނގާނެއެވެ. އަދި މި ސިޓީގެ ކަންކަން އިންތިޒާމުކޮށް ހިންގާ އިދާރާގައި ސްރީލަންކާގެ ރައްޔިތުން ނޫން މީހުންނަށް ތިބެވޭ ގޮތަށްވެސް ހަމަޖައްސާފައި އޮތެވެ.
މި ފަދަ ނުކުތާތަކުގެ ސަބަބުން ސްރީލަންކާގައި ވެރިކަން ކުރާ ޕާޓީއާއި އިދިކޮޅު ފަރާތްތަކާއި ރައްޔިތުންގެ މެދުގައި ބިރު ހީވެފައި އޮތީ ބިލު އޮތް ގޮތުން "ޕޯޓް ސިޓީ ޗައިނާގެ ކޮލޮނީއަކަށް ވެދާނެ" ކަމަށެވެ.
މިއީ އަސްލެއް ނެތް ބިރެއްވެސް ނޫނެވެ. ސިރީލަންކާގެ އިގްތިސާދާއި ސިޔާސީ ޙަޔާތުގައި ޗައިނާގެ ނުފޫޒު އިތުރުވެގެން ދިޔަތަން ވަނީ ފެނިގެން ގޮސްފައެވެ. ޗައިނާއިން ސްރީލަންކާއަށް ދީލަތިކަމާއެކު ޑޮލަރުތައް ދެމުން ދަނީ ސަބަބަކާ ނުލައެއް ނޫނެވެ. ޖޫން 2021ގައި ސްރީލަންކާގެ ރައީސް ވަނީ 60 މިލިއަން ޑޮލަރު ހޭދަކޮށްގެން ޗައިނާއިން ހަދާފައިވާ ޗައިނާ ލަންކާ ފްރެންޑްޝިޕް ހޮސްޕިޓަލް އިފްތިތާޙު ކޮށްދެއްވާފައެވެ. އަދި ހަމަ އޭގެ ދުވަސްކޮޅެއް ފަހުން ފެނިގެން ދިޔައީ، ކޮލޮމްބޯގައި ހަދަ 17 ކިލޯ މީޓަރުގެ ހައިވޭއެއް ހެދުމުގެ މަސައްކަތް ޗައިނާ ހަރބާ އިންޖިނިއަރިންގ ކޮމްޕެނީއާ ޙަވާލު ކުރި ތަނެވެ. ޗައިނާ ހާބާ އިންޖިނިއަރިންގ ކޮމްޕެނީއަކީ، ކޮލޮމްބޯ ޕޯޓް ސިޓީއާއި މަޓާލާ އެއަރޕޯޓާއި ހަމްބަންޓޯޓާ ޕޯޓްގެ މަސައްކަތް ކުރިއަށް ގެންދިޔަ ކުންފުންޏެވެ.
ޗައިނާ ހާބާ އިންޖިނިއަރިންގއަށް ހައިވޭގެ މައްސަކަތް ލިބުނީ އެކުންފުނިން އަމިއްލައަށް އެމަޝްރޫއަށް ހޭދަކޮށް، އެތަން ބިނާކޮށް، އެތަން ހިންގައި، އެއިން ފައިދާ ނަގައި ދެން ކަނޑައެޅިފައިވާ މުއްދަތަށް ފަހު ސަރުކާރާ ހަވާލުކުރާ ގޮތަށެވެ.
މިކުންފުންޏަކީ ޗައިނާ ސަރުކާރު ޙިއްސާވާ ކުންފުންޏެކެވެ. އަދި މިއީ ކޮރަޕްޝަންގެ މައްސަލަތަކުގައި އެމެރިކާއާއި ބަންގްލަދޭޝްގައި ބްލެކްލިސްޓްކޮށްފައިވާ ކުންފުންޏެކެވެ. ކޮޅުނބުންވެސް މިފަދަ މައްސަލަތަކެއް މިކުންފުންޏާ ދެކޮޅަށް ތަހުގީގުކޮށްފައި ވެއެވެ. 2015ގައި ކުރީގެ ރައީސް މަހިންދަ ރާޖަޕަކްސަގެ ކެމްޕޭނަށް މިކުންފުނިން ހޭދަ ކުރިކަމަށްވެސް ތަހްގީގުކޮށްފައި ވެއެވެ. އެއީ ޖުމުލަ 1.1 ބިލިއަން ޑޮލަރު ހޭދަކުރި މައްސަލައެއްގައެވެ.
ޕޯޓް ސިޓީގެ މައްސަލާގައި ފާޑުކިޔާ ފަރާތްތަކުން ފާޑުކިޔަނީ އިންވެސްޓްމެންޓަކަށް ނޫނެވެ. ނަމަވެސް މުޅި ޕްރޮޖެކްޓް މެދުވެރިކޮށް، ޗައިނާއަށް ރަތް ދޫލައެއް ސްރީލަންކާއިން ފެތުރުމުން އެކަމާ ދެކޮޅަށެވެ. އެފަރާތްތަކުން ސުޕްރީމް ކޯޓުގައިވެސް އަދި މީޑިއާގައިވެސް ފާޅުކޮށްފައިވާ ޝުއޫރުތަކުގައި ބުނެފައިވަނީ، ޗައިނާއަށް ރަން ތަބަކެއްގައި މިޕްރޮޖެކްޓް މިހާރު މިއޮތް ގޮތަށް ޙަވާލުކުރުމުން ސްރީލަންކާގެ ސިޔާދަތު ގެއްލިގެންދާ ކަމަށެވެ. އަދި މީގެ ސަބަބުން ޗައިނާ ކުންފުނިތަކަށް އެއްވެސް ގާނޫނީ ހުރަހެއްނެތި ސްރީލަންކާގައި އޮޕަރޭޓް ކުރަން ފަހިވެގެން ދާނެ ކަމަށެވެ. އަދި ހަމައެފަދައިން ފައިސާ ދޮވެލުމުގެ އަމަލުތައް ހިނގަން ފަށާނެ ކަމަށެވެ.
ގުޅުން ހުރި ލިޔުންތައް
ޗައިނާ ކުންފުނިތަކަށް ލަންކާގައި ބޮޑެތި ޕްރޮޖެކްޓްތައް
ޕޯޓް ސިޓީގެ ސަބަބުން ލޯން ލިބުން ދަތިވާނެ
ޕޯޓް ބަލާލަން ދަތުރު ހަމަޖައްސަނީ ޗައިނާ އެމްބަސީން
ޕޯޓް ސިޓީ ވާނީ މަނީ ލޯންޑެރިންގެ ހަބަކަށް
ސްރީލަންކާގެ ޓްރާންޕެރެންސީ އިންޓަރނޭޝަނަލްގެ ޑެޕިއުޓީ ޑިރެކްޓަރ ސަންކީތާ ގުނަރަޓްނަ ވިދާޅުވާ ގޮތުގައި ސްރީލަންކާގެ ގާނޫނީ ބާރު ޕޯޓް ސިޓީގައި ނެތުމުން ކުށް ކުރާ ފަރާތްތަކަށް މިތަން އަމާން ވެށްޓަކަށް ވެގެންދާނެއެވެ.
މީގެ އިތުރުން މަސްލަހަތު ފުށުއަރާ ބައެއް ކަންކަންވެސް މި ޕްރޮޖެކްޓްގައި ހިނގާފައިވާ ކަމަށް މީޑިއާއިން ހޯދި ހޯދުންތަކުން ދައްކައެވެ. އޭގެ ތެރޭގައި ޕޯޓް ސިޓީގެ ގާނޫނީ ވަކީލަކަށް އައްޔަން ކޮށްފައިވާ ފަރާތަކީ، ސްރީލަންކާގެ ރައީސްގެ ސެކްރެޓެރީއާ ގާތް ގުޅުމެއް އޮންނަ ފަރާތެކެވެ.
މިހުރިހައި ކަމެއް ފެށިފައި ވަނީ ބޮޑެތި އަދަދުތަކުން ޗައިނާގެ ޝަތުރުތަކާއެކު ލޯންތައް ނެގުމުންނެވެ. ކޮންމެ ލޯނެއް ދެއްކުމަށް ދަތިވާ ފަހަރު ކުރިމަތިލާން ޖެހެނީ އައު ލޯނަކާއެވެ. އެހެން ދަމުން ގޮސް ލޯން ދޭފަރާތަށް ކަންކަން ފަހިވެގެން ދިޔައީއެވެ.
